Nuraxi Arrubiu
di Guglielmo Piras

Podessi ponni infattu
contai dogna passu
de totu’ is mannus mius
chi hant lassau arrastus
de storia in dogna mòri
e strantaxiau atrivìdas
turris in s’oru a is bisus…

Podessi mai arregolli
sa melodia antiga
de bèntus e araxis
chi ancora oi m’intrigant
su nuscu e is coloris
de seddas e padentis
nidas e arèstis…

Podessi mai sciri
su chi hant bistu
montis e arroccas
e su chi hant arregortu
mitzas e arrìus
prima ‘e imprassai su mari…

Podessi mai connosci
s’ammaju ‘e cussus xèlus
e su misteriu arcanu
de cussas nottis ‘e ossidiana
chi hant billau pastòris
e gherreris in giriu a is fogus…

Podessi chistionai
a custas perdas rujas
testimongias de anninnias
de janas
e cantus de mammas e pipìus
chi ancora oi mi tzerriant
cumbidendumì a sodigai biatzu
in custu dominariu
de luxi e de memoria
po torrai a sa dòmu
aundi se sempri seu nasciu.
Aundi agattai torra
s’arrexiõi e s’acunortu
a custu bivi miu
contras custu tempus
isciàpidu aundi luxit
su nudda, e nudda
tènit prus valori.

NURAGHE ROSSO
Potessi stargli dietro – contare ogni passo – di tutti i miei padri – che hanno lasciato tracce – di storia in ogni sentiero – ed innalzato temerarie – torri al limitare del sogno…// Potessi mai raccogliere – la melodia antica – di venti e brezze – che ancora oggi mi consegnano – il profumo e i colori – di valli e foreste – vergini e selvagge… // Potessi mai sapere – ciò che hanno visto montagne e rocce – e ciò che hanno raccolto – sorgenti e fiumi – prima di abbracciare il mare…// Potessi mai conoscere – la meraviglia di quei cieli – e il mistero arcano – di quelle notti di ossidiana – che hanno vegliato pastori – e guerrieri intorno al fuoco…// Potessi parlare – a queste pietre rosse – testimoni di ninnanne di fate – e canti di madri e di bambini – che ancora oggi mi chiamano – invitandomi a proseguire fiero – in questo bastione di luce e di memoria – per tornare alla casa – dove da sempre sono nato. Dove trovare la ragione – e il conforto a questo mio vivere – contro questo tempo insulso dove luccica il nulla – e nulla ha più valore.