Dea celeste da s’Olimpu falada
prena e grascias che parma frorida
ses fogu ardente in sa die niada
dono e recreu de s’umana vida
intro su coro ti jucco affrisciada
e in sa mente che ses bene iscolpida
sa natura ne restata incantada
ca senza te non podet istare.

Ses su sole chi naschit su manzanu
e a sa luna sa notte acches banna
non binn’ at ne accurzu ne lontanu
che a tie bellesa pius manna
astru lughente si non t’appo in manu
a custu coro s’anima li danna
app’apertu in su pettus donzi janna
e canno cheres tue as a intrare.

Nobile altera e trattu signorile
laras dechidas de colore rosa
carre bianca d’edu giovanile
formana una figura armoniosa
sos modos bellos e su trattu gentile
facchen de tene sa perfetta isposa
amadada turturella zeniosa
cumpanza preferida in d’un’altare.

Sos paladinos gherrana a duellu
pro Angelica fizza e Galafrone
gherrare fin’ a morrere senz’appellu
dia pro tene istimada anzone
su fiore e natura pius bellu
ti dia ponnere sutta su balcone
oggettu de sa mia istimascione
mai in su munnu ti dia lassare.

Reina de sas deas soverana
de onzi ninfa tue ses segnora
sas famas de bellesa chi ti dana
nan chi ses bella prus de s’aurora
ses de Venere sa gemella umana
de sa terra connotta incantadora
de s’universu istella brilladora
chi su sole si devet virgonzare.

Chi gires in su munnu tottu cantu
bellesa che a custa no accattas
opera ses naschida pro incantu
paraulas a sos versos tue adattas
non basto deo a ti dare su vantu
solu chin sa mirada tue allattas
sognos d’amore cun mustras esattas
si ses disposta de coro a mirare.

Si s’arpa de Apollo giuttu aia
e sa vhoche de Prededdu Nanu
cuncertos d’altu puntu in armonia
tia sonadu chin su cantu arcanu
rimas e versos iscrier ti dia
che a Dante su poeta toscanu
verso celestiales t’iscriia
po ti poder che dea cunsacrare.

Venus bella de te est imbijosa
Minerva sapienzia ti at dadu
Diana in sa cazza bellicosa
de laru sa corona at preparadu
Giunone s’ermosura graziosa
Mercuriu sos ojos ti at armadu
Giove solu pro te a cumannadu
su coro tou de ardore a prenare.

Cupidu ti at sa feretra pienu
de frizas penetrantes amorosas
Nettuno a sas sirenas dada alenu
pro ti cantare notas delisciosas
Eolo chi as sos ventos dat velenu
pro te los mudat in petalos de rosas
sa paraulas tuas suni prosas
chi donzi umanu faghen rallegrare

Orfeu sonat pro te innos d’amore
zelosas restan Pallade e Pandora
imbija an de su tou candore
pius deissas ses tue segnora
piu de issas as tue lucore
in s’Olimpu ti cheren a dogn’ora
ca ses pius de Flora incantadora
ca donzi Deus faghes raggirare.

Sos amante chi sa terra at naschidu
dian faghere pro te calchi acconcada
ma sas terras ca tie an parturidu
formare dian pro te un’armada
sa prus forte chi sa Sardigna at bidu
pro difennere sa rosa profumada
de cust’isola Sarda nostra amada
tue ses su modellu singulare

Da sa notte in s’immensu firmamentu
tue ses de d’onz’astru sa reina
iscudes rajos prus de fogu tentu
lughes pius d’Istentale mattutina
abbaglia s’aurora e das istentu
colorada in su pettu, alabastrina
allunghe sa bellesa peregrina
corfanne coros chi ti den mirare.

Fini chi cante sa tua bellesa
oggettu de amore in sognos pios
donzi idea e coro mea est presa
solu dissizzos alimento e bios
de custa dea non n’appo s’intesa
comente s’abba curret in sos rios
gai ana currere sos dissizzos mios
paris chi s’abba ghettanneche a mare