Oe so torradu a domo de mama
di Larentu Pusceddu

Oe so torradu a domo de mama,
inue so naschidu e fattu mannu,
imprapastulande sas primas paraulas,
inue apo prantu sos primos dolores,
inue su risu meu at intinzidu.

Issa como non b’est prus
intro custos muros,
unue su carchinatzu
che ruet pro s’umidura
ca s’iserru e su tempus
mudat totu in ruinas.

Intendo su mudimine
in custa domo
chi fit semper aberta a sos bichinos
e a cad’ora fracaiat de cafè.
Sa ziminera a focu ismortu
mi prenet su coro de amargura
e sos ocros de lacrimas buddidas.
Sa linna carpida de sos barcones,
in colore de chelu isbiadidu,
chircat galu de cuare s’aposentu
a sa luche potente de su sole.
E sos isportellittos aberzo
pro abaidare su locu a mesu die.
Sa roccas de sas pitzinnia,
sun semper inue las apo connottas,
maduras, de cada forma e mannaria,
cucuzadas dae s’eterna
laneddda ruiastrina.
Cando apo pensadu
te torrare a inoche
a viver sa betzesa,
sa domo s’est prena de pantumas
chi ridian allegras,
abaidande a mie.

(Inedita)