Oje est Pasca.....
di Franceschino Satta

Oje est Pasca. Milli cantos
isparghimus in chelu. S'armonia
nos allattat su coro, pintu ebbia
de durches meravizas e d'incantos.

Luchet su sole in terra. Tottucantos
precamus a distintu su Messia
pro chi non b'hapat prus "ipocrisia"
in cust'umile terra iffusta 'e prantos.

Non sun tempos de gosu. Su dolore
tinghet sos coros de benenu anticu
e nde trazat s'onestu in percas malas.

Sennore arcanu, ponenos sas alas
de sa birtude, pro che s'inimicu
torret serenu in brazzos de s'Amore.