Omine beru, fattu a s'antica
di Franceschino Satta

(A Innassiu Corrias)

Chin su pinzellu 'e s'anima
has pintu camineras
ube si colat solu
chin su passu serenu
de s'onestade bera.
Tue has pintu
chin s'alinu 'e su coro,
milli lizos chi juchen de s'ispera
disizos d'amistade e sonnios d'oro.
Ses un'omine beru,
fattu a s'antica,
sapiu e balorosu,
ca juches sa cussenzia
de sa fide chi bramat
sas durches galanìas chi s'isparghen
in sas agheras nettas
de sa birtude umana.
Cando sa sorte mala ponet trincu
chin irbirgos de focu, e ticch'aggorrat
in percas d'abbolottu,
tue aperis sa janna pro chi b'intret,
chin sa luche bertera 'e sas ideas, s'affettu, su chi nutrit
sas pérelas dechìas, sempre prontas,
a bentulare in artu
-ube s'aghera bona
accasazat sas nues de su chelu-
panderas de cossolu
e de fraternu amore, ca ses babbu,
de sentimantos sanu,
maridu onestu, e fizu
de zente chi t'hat dau
s'alinu durche de s'amore eternu.
Tue intantu pro commo sichi a currer
sas prattas e-i sas bellas molinadas
De custa bida nostra prena 'e sonnios,
e sichi a bincher pannos de recreu
e medallias de gloria. A largos annos!

(Monte Ortobene, su 24 de agustu de su 1995)