Omine contivizadi sa Terra
de Antonio Maria Masia

(Moda con versi rimati incrociati e ripetuti, perché l’uomo non distrugga il suo habitat, rispetti l’ambiente e la natura.” Contivizare” vuol dire avere cura, amare, coltivare con amore quella che Qualcuno – su Mere Mannu - ci ha assegnato come nostra unica dimora)

1- 18
Omine contivizadi sa terra
ca sa dimora tua est solo custa,
assoliad’in istiu o isfusta
dae cudda nue chi diventat riu,
su nidu nostru hat postu in cue
su Mere Mannu pro gratzia donada,
isfusta, o in istiu assoliada
dae cudda nue chi diventat riu
isfusta o assoliad’in istiu
chi diventat riu dae cudda nue,
su nidu nostru ha postu in cue
pro gratzia donada su Mere Mannu,
tenela bella non li fettas dannu.
Iscur’a tie si ‘ochis s’istella,
non li fettas dannu tenela bella
si ‘ochis s’istella iscur’a tie
contadi mortu frittu che nie
dae su coro, sintzeru, ti lu prego.

1-16
Chi ses padronu tzertu non lu nego
ma non la trattes custa Terr’indonu
gosal’in paghe non li fettas gherra
si no a sos fizos lassas desertu,
chi ses padronu non lu nego tzertu
ma non la trattes custa Terr’indonu,
tzertu non lu nego chi ses padronu
ma indonu non la trattes custa Terra
gosal’in paghe non li fettas guerra,
si no desertu lassas a sos fizos
chena puzones, arvures e lizos,
e pur’in chelu che faghes presones
chena lizos, arvures e puzones
e che faghes presones pur’in chelu,
su fele dae mente ‘ogatindelu
ca sos ch’has in manu sunt tesoro.

2-18
Omine contivizadi sa terra
ca sa dimora tua est solo custa,
assoliad’in istiu o isfusta
dae cudda nue chi diventat riu,
su nidu nostru hat postu in cue
su Mere Mannu pro gratzia donada,
isfusta, o in istiu assoliada
dae cudda nue chi diventat riu
isfusta o assoliad’in istiu
chi diventat riu dae cudda nue,
su nidu nostru ha postu in cue
pro gratzia donada su Mere Mannu,
tenela bella non li fettas dannu.
Iscur’a tie si ‘ochis s’istella,
non li fettas dannu tenela bella
si ‘ochis s’istella iscur’a tie
contadi mortu frittu che nie
ti lu prego, sintzeru, dae coro.

2-16
Già ch’has in manu sa vid’issoro
non penses a oe, abbaida luntanu,
pro fagher deghe bi cheret noe,
l’hapas in mente che preferida,
già ch’has in manu s’issoro vida
non penses a oe, abbaida luntanu,
già chi s’issoro vid’has has in manu
abbaida luntanu, non penses a oe,
pro fagher deghe bi cheret noe,
che preferida l’hapas in mente
in dogni logu rispetta sa zente,
leache s’abba ue b’est su fogu
rispetta sa zente in dogni logu,
ue b’est su fogu leache s’abba
salva Gesusu e lassa Barabba
chi gai lu seberas caminu veru

3-18
Omine contivizadi sa terra
ca sa dimora tua est solo custa,
assoliad’in istiu o isfusta
dae cudda nue chi diventat riu,
su nidu nostru hat postu in cue
su Mere Mannu pro gratzia donada,
isfusta, o in istiu assoliada
dae cudda nue chi diventat riu
isfusta o assoliad’in istiu
chi diventat riu dae cudda nue,
su nidu nostru ha postu in cue
pro gratzia donada su Mere Mannu,
tenela bella non li fettas dannu.
Iscur’a tie si ‘ochis s’istella,
non li fettas dannu tenela bella
si ‘ochis s’istella iscur’a tie
contadi mortu frittu che nie
dae coro ti lu prego, sintzeru.

3-30
Si tue ses omine, omin’abberu
ama sos benes chi sunt in tottue
gai a s’incrasa mezus lo tenes
e mai ti lighes in manos e pese,
si omin’abberu, tue omine sese
ama sos benes chi sunt in tottue,
si ses omin’abberu, omine tue
chi sunt in tottue ama sos benes,
gai a s’incrasa mezus los tenes
e mai ti lighes in pes e manos,
sighinde caminos che sunt invanos
fattos de bancas e puru terrinos,
chi sunt invanos sighinde caminos
de terrinos fattos e puru bancas,
si mancat s’alenu e s’oju tancas
est c’has seminadu solu velenu,
si s’oju tancas e mancat s’alenu
e s’intottue isprammas sos fogos
a tie matessi iscontzas sos giogos,
e duncas ti naro pens’assunessi
sos giogos iscontzas a tie matessi,
e pens’assunessi duncas ti naro
ch’in custa dimora solu m’amparo,
su tempus cumprilu e sas annadas
e si las atzettas no est indebadas,
mi chi sas mias non sunu minettas
e no est indebadas si las atzettas,
mi chi non sunu minettas sas mias.
Omines fortes e feminas pias
com’iscultadela ’ene sa Terra:

3-6
Issa non cheret peruna cuntierra
ne malu fogu ne odiu ne ruina
paghe e amore disizat ebbia
innidas roccas frunidas de serra
cun arvures e rosas chen’ispina
pro chi sos fizos agatten poesia.