A Nino Fois

Como jai t’ido toppu pili canu
in sa cradea settiu mesu ischidu
ma juches galu pricas de sentidu
e a chizu bassu sa mirada leas
ma in cussa mente galu sas ideas
rundan valores sardos galu invanu
e non t’arrendes leas sos sapores
chi timbrana su sardu che sennores.

Colat su tempus paret unu babbu
e nois semmus sos fizos de passazu
tue in sa Sardigna su messazu
lassas chin sa cultura e chin istima
forzis po custu ti ricamo in rima
custas ottadas fattas chin su grabbu
poeta de tempus de valore anticu
juches galu sapores de su tricu.

Arzillu t’happo‘istu premiande
che presidente abile e balente
e chin su coro in manos po sa zente
sempes dispostu po sa limba sarda
intas’a sa dis’ora a ora tarda
f’isti galu che mastru ispiegande
son isparinde cuddos piscadores
chi piscana in sa fide sos valores.

Est veru cada caddu che ronzinu
torrat in custa terra de ispicas
a tramandare tottu sas fatticas
a sos chi ponen’a nou sos passos
torran e frorin a nou sos zassos
e curret su sudore in su trainu
e lastimamus sa luche a misura
chin d’unu velu in ojos a cresura.

Tue caru Nino a medas mundanos
has regalau un umiltade istrinta
bivas a longu tue l’happas binta
sa chi has jocadu a sorte s’iscumissa
siat a chent’annos cuss’urtima missa
cando si junghen’a pare sas manos.
tando si pasat in campos de groria
e arrumbas in sa pazina‘e s’istoria.

10/02/2014