Attacar’a Gavinu no fit zocu
fit che a li ponne focu a una mina
fit che a si ponne a tocare su ocu
in su fochile alluttu ‘e sa cuchina
bisonzàt chi no esseret a tocu
chin versos bellos bona canterina
e chi esseret ferradu de sicuru
che caddos in Bonorva cussu puru.

Testone bravu bonu cantadore
cheriat in Bonorva a monumentu
Pirastru riccu ‘e versos tramadore
de sa poesia fit mannu talentu
Cupeddu bon‘e metrica e cantore
fachiat bella grobe in su mementu
Pittanu s’inventore in sa piatza
de modas trintases de cada ratza.

Farina babbu e fiza cantadore
chin bon’istile bene carculados
cantana s’allegria e su dolore
chin versos bellos bene preparados
Antonandria Cucca su terrore
po sistemare sos disamparados
ca si non fini prontos e a postu
be pessat issu a fache su compostu.

Cucurra bratzu tostu po Gavinu
unu rivale mannu e bona famma
ma Contene cantande de continu
l’at alluttu su portu chin sa framma
Contene che dimoniu in su caminu
los rintanàt chin versos a sa gamma
e a Siligo torrat chin sos trofeos
de cussos bonos non de cussos feos.

Ma fini tottu bravos cantadores
in custu tempus nollos disizammus
garrios de memoria e de valores
e de sentidu prontos e lassammus
su primu postu po custos unores
po sa bravura e semper’imperamus
chi bè nd’imparet improvisadores
ca oje mancan sos menzus cantores.