| 1
Orune cara
solu in sognos ti potho visitare
cantu mi est amara
sa vida senza bi podes torrare
nessi intro sa bara
ispero nos podemas incontrare
ca ja ischis chi tue
a uve so annadu b’is tottue.
2
Ahi tristu distaccu
su chi jeo pro te appo suffridu
su coro meu maccu
de continu pro te atta battidu
mai est restadu istraccu
nudda de su faeddu appo perdidu
tottu m’ammento ancora
de sos usos de sa prima dimora.
3
Si pessare bi dia
a tottu su chi inie appo lassadu
onzi domo onzi via
dae cuccure e Tetti a su Marcadu
sa ruche e Sant’Andria
e Cadone su primu vhichinadu
umbe prus frequente
appo curtu e jocadu allegramente.
4
Su bellu panorama
chi mustrat d’oriente s’arveschida
cudda vhoche de mama
chi mi muttiata a sa remunida
in sa costa ogni gama
donzi cosa ancora appo imprimida
comente in su battizzu
su chi dan babbu e mama a donzi fizzu.
5
Sas esta e su Cossolu
primu lunis d’agustu festeggiada
in coro n’appo dolu
de donzi cosa perdida e lassada
s’ere pottidu a bolu
lassavapo derettu cantu b’ada
ma soe inoche innedda
aspettene che ainu sa sedda
6
Eliches seculare
chi sezzis dae aes annidadas
Cuccumache s’altare
chi miraio sempre in sa leadas
feminas de amare
cantos , tenores, dulches serenadas
ballu lestru a tre pizza
ballenne paris chin mama e chin fizza.
7
Unertore s’untana
de abba frisca in d’unu locu amenu
ogni sidu ogni gana
appo e te in custu locu anzenu
balsamu chi mi sana
che abba lena s’assuttu terrenu
Toccu e su Luristeri
sa Matta, Corjos e sae Magneri.
8
In piazza sos ballos
de su Carmelu sa festa mezzore
sos sonettes sos cantos
in sas barraccas sos bellos tenore
calavrinas e caddos
alligru fitti donzi vennidore
turrones dissizzados
ch’ in cont a casu venian pacados.
9
Sa gamas campanadas
che istellas in campos fioridos
d’istiu sas leadas
in campos siccos e tottu ingrogghidos
senna sas suppuzzadas
galu m’ammento e sos rivos sididos
s’aurora in sa fronte
vidia ogni manzanu in s’orizzonte.
10
Profumada s’ aera
de castennarju, lidrone e tiria
Marreri ,Gortheddera
locos amenos de sa pizzinnia
campos chi in primavera
davan cuntentu a s’anima mia
como bos penso invanu
ca non potto torrare fittianu.
11
De Cussorja e cuvile
ischiapo de tottu in cumonale
fiores de aprile
coronavan sas roccas de Nunnale
se feminas gentile
in coro meu non b’atta eguale
in sognu mi venides
ca est vantu pro mene su ch’ acchides.
12
Sa costa e Mastru Gattu
Montricu Mannu, Galile e Ussone
de pintore su trattu
distintu as che locu e rejone
nos benian iffattu
simpatias in d’ogni occasione
como soe che chie
no mi connosches e non connosco a tie.
13
Sant’Efis e sa Lada
In sas alturas de s’ischina e sussu
assimizzu non bada
a sos profumos chi no appo piussu
in Sardigna famada
pro zente de corazzu e firmu brussu
zente de coro riccu
chi no si lassat nudda pro s’amicu.
14
Molas e Niritzai
Putthos anticos a idolos sacrados
Truncheddu e Currulai
locos duros dae feras amados
su Sartu, Ispidinai
pasturas riccas e campos serrados
accurzu a Logulene
Ma solu ammentos custos son pro mene.
15
Che bolu e puzzones
visitavamus vinzas e cunzados
ervheches e anzones
distintas in lachinza e madricados
ghettanne a vidathones
prima e s’attonzu in sos campos messados
a tricu semenadas
dopo chi donzi arjola iti incunzada .
16
Mai in sa mente passat
su dessizzu de su nidu natiu
a s’ammentu m’abbassat
de lagrimas in ojos su guspiu
su fastizzu non dassat
riposare custu coro affliggiu
ma serro tottu in coro
tanco sos ojos e minn’addoloro.
17
Roccas e montes e muros
tancados dae muros e crejuras
cubadorjos sicuros
de frades bonos e animas duras
monumentos iscuros
de bannideras pro animas puras
a tottu azzes gullidu
de donzi fizzu chin coro affliggidu.
18
Como no so infustu
in manzanu de abba o de lentore
nudda e tottu custu
vio canno mi ch’intro in s’ascensore
ma semper cussu gustu
tenzo inserradu che secretu amore
ohi si bi podia
torrare nessi carchi ora bi cheria.
2013
|
