PARIGI
Di Lorenzo Brandinu

(Bataclan)

Sas vidas istruncadas che fiores
luchidu dogni visu istat fieru
non si leghet s'insoro disisperu
mancu sos patimentos e dolores
pari sos vintos e sos vinchidores
aprontados pro s'urtimu misteru
b'est sa luna, sa note est delicada
ma dogni lughe paret istutada

sun mortos, iscuros innossentes
astros de zoventude e de amore
in sa fronte perlitas de sudore
de sambene rujastru risplendentes
an allizadu sos visos ridentes
vigliacos ammantados de rancore
sas mamas los isetan in su nidu
senz'ispera, ca prus no an sentidu

sterridos a terra in bator muros
senza neche an apidu sa morte
totu paris su debile e su forte
pro sos coros nieddos e iscuros
non sun atos de fede ma impuros
sos ch'istratzan de s'ateru sa sorte
presoneris de fele e de venenu
no ana pasu pro su bene anzenu

no an pasu rispetu o rimpiantu
maleficos astores disumanos
chi nde distruin sos fiores sanos
lassana mamas chin su coro afrantu
suspiros d'isconsolu e disincantu
chi disvelan sacrilegos profanos
s'esistit unu mere 'e su criadu
lis diat su chi s'ana meritadu

Menzione al concorso di San Sperate anno 2016