Pasa.

Propriu curiosa sa natura:
cun duos coros faghet alluminzu
pro atzender de vida su lughinzu
chi cun su tempus, penas e dulcura,
in bratzos ponet cussa criadura
frutu ’e amore e de arcanu ordinzu.

E cun sa lana, ghindalu e archizu
si la sighit a tesser cussa trama:
sa ch’est naschida fiza faghet mama,
paris a chie tando fit su fizu:
de babbu li dat como su manizu
e de vida alimentat sa fiama.

Si leat pro su giovanu matana,
ma de su etzu como non si curat,
antzis, sa mezus cosa che li furat
pro chi passen disìzos cun sa gana,
fintzas de s’abba sicat sa funtana
e poi in cantu podet lu trascurat.

Comintzan sas ispèras a mancare
e de apentos calat sa pretesa,
nd’acudin solitudine e mudesa,
lughen sos ojos prontos a bolare
e sas laras chi proan a cantare,
sun lampizos de vida, in segretesa.

Ma, istraca in petorras si li pasat
cussa mente oramai ingalenada,
foltzis de vida e tempus apagada,
cun su sole chi tebiu lu ’asat
solu, in cussu giannile como pasat,
cun ammentos de vida ch’est passada.

Franco Piga (Romana ‘SS’)
Sant’Andria 2006