Pasca 'e veranu
di Salvatore Ladu

Est Pasca de aprile, est già veranu
Tempus de gosu, s'istajone bella
Sas primas chimas de sa pampinella
Riden allentorias su manzanu.

Cantan sos puzzoneddos in amore
Indaffaraos preparande cria
Su poeta lis cantat poesia
Pintande versos innidos che frore.

Su sementu drommiu un'istajone
Sutta e su caentu 'e frocca lada
S'ischidat promottinde bona annada
Tancas frorias, su trigu a muntone.

Cantu est oje in erva, frore, irvuttu
Si est infustu 'e s'umanu sudore
Cras ada esser pane, e cussu frore
Saporidu e licanzu attinde fruttu.

E su durche murmuttu 'e sa funtana
De s'abba chi da monte a badde falat
Cun nuscos delicaos nos regalat
Giuntas de gosu in oras de mattana.

In sos cortiles, nonnos a piseddos
Brullan contende de tempos famios
Issos si los carinnan divertios giogan
che innossentes anzoneddos.

Pasca 'e veranu in s'andala 'e sa sorte
Chi Zesus a su mundu at cussinnadu
Unu chelu d'isteddos ammantadu
Binchende su misteriu de sa morte.

E nidos chi dan fruttos de amore
A culumbeddas ch'allattan cantende
Lizos de coro, bragheris creschende
Illuminados, faghendesi onore.