Passatu è lu tempu
di li canti e li sarai
candu era solu branu
lu tempu ‘inidori
e middi luccicori
illa custera a occhi a mari.
Passatu è lu tempu
di dì cari
chi rosi mi daggjìa
maggju, pal me buttatu
almunìa d’una stasgioni
chi chena fini parìa
ricca di suiddatu,
solti signata e folti
di bracciali fiuriti
e agnati suliani
illa me’ colti.
Passatu è lu tempu
di chiddi amori isciolti
e poesii, e versi, e rimi
chi traditori in fini
nudda m’ani adducatu
e s’è lu tempu turratu
a li ciurrrati trini
comu in uttugnu intratu.
E abà so solu ammenti
e li passioni aultiti
so’, li sonni scriduti
di l’àttimi cuntenti
in sulitai cuati
e in lìttari d’amori spinti,
tenti cun gjilusìa
ma da la ‘ita ‘inti
chì eu no mi cridìa
d’esse cussì vinutu
a l’anni arresu, mutu
la me’ passona prìa
di tuttu lu ch’aìa
e di cant’aggju paldutu.

1° classificato sezione verso sciolto -Premio di poesia “Tiu Finu” - Romana 17-08-2014