Semus in ierru coro meu.
Sa iddia si est pasada
in su tallaranu antigu
e fritu si allumat
s’arghentu ‘e sos isteddos.

Ma cantas lunas
ghiraditas
sunt faladas
in su pendinu meu
cun imbòligos de ammentos
e de tempus
otora frimmu
in sas anderas de su coro.

Ei como?
Ite poto contare como
in su pasu
a custu iscàmpiu ’e vida
chi ancora mi cantat
imbraconada a sero.
A custos versos penados
chi chena rejones
m’iscussertant sa conca.

Cale su sensu
de dare a sos meledos
allorigados in su silentu
de custas inùtiles torradas
chi si perdent
comente atumbos lèbios
intro su turmentu ’e sos passos.