PASTORE
Di Sebastiano Mariani

Che rimorsu lontanu in sa cussentzia
M’apparis o pastore in sa memoria
In turveras de longa percurrentzia
De custa terra avara ses istoria
Gherra fatica isettu e paca gloria
Ti ses nutridu chin pane e passentzia

Unu punzu de casu intro sas manos
Fit po tene e familla su sustentu
Sempr’in isettu de bonos beranos
Ti visitavan arsuras e bentu
Montes e roccas mai in sos pianos
E tue de su pacu fis cuntentu

Semper has mannicadu a mesu mossu
A bortas ti est bastadu unu sorrisu
Ca non fit semper su tempus ditzosu
E si lanza it sa parte chi has divisu
Chin su fidele cane hazes detzisu:
A ateros sa purpa a bois s’ossu

E canno in s’impoddhile d’una die
Su contu de sa roba non torravat
Donzi tantu unu pecus bi mancavat
Ti dimannavas : Ma propiu a mie?
Fit fera o manu manca chi furavat
O su tempus chi trampavat a tie

Si de carchi disgrascia sos insonos
Chin novas malas t’han fattu visita
Vintu puru hat sa ranchida vinditta
Ma sas prus vortas has dadu perdonos
Has in su coro cussa leze iscritta
s’onore d’esser umiles e bonos

Canno s’anima tua arta volenne
Ismentica d’umana cundierra
A s’affettu lontanu fit pensenne
Su tou cantu arcanu a boche istesa
Bagnat ervas e bestias paschenne
D’amore e malinconica e tristesa

Pastore chi sos tempos attraessas
Po te non son finidos sos fastizos
Oje su campu abbandonas sos fizos
A su tempus passadu est prus chi pessas
Canno bi pesso s’oscuran sos chizos
Preganne a ti sarvare chi resessas
Si su pastore morit in Sardigna
Terra amara finidu has d’esser digna.