Oras d'ammaju suta sos isteddos
respirados in nuscos beraniles
e trèmulos de lughe in sos foghiles
cumpanzos de s'ilgerru in sos pinnetos,
in su mudore 'e bisos e isetos
d'òmines imbetzados da piseddos.

Pitzinnu trista sena pitzinnia
brivadu de ternuras e iscola,
ànima vagabunda, barca sola
in mares sena vela e ne timone;
est custa chi ti tocat de presone
in irridos d'ispera e tribulia.

Colas su tempus cun canes e bamas,
caldarones, pischeddos e cannita;
dogni fiadu nd' 'ogas a sa tita
e a su ferru sa robba paschinde.
est una festa cand'ides beninde
s'abba atunzina chi prenat sas lamas.

Ma t'alpilas astradu a s'istrimuzu
disconnotu in s'iscuru, sena luna,
tando sas oras contas un'a una
bramende de su chelu sos Chintales:
sunt de sa die noa sos signales
e de su note iscatzant su revuzu.

S'arrejonu 'e su 'entu in su rocalzu,
e su cantigu ladru 'e su matzone,
sos butios de s'abba in su lamone
ti contant ch'est lompide temporale,
cun ùrulos de cane in su pasciale
e trastos atapende in su furcalzu.

Lestru t'ammagas, cuende s'olmina,
s'alenu leas de zente metzana;
miras, iscultas, si mustrant sa gana
de s'apozare o furare in cuile,
prontu a lis dare de pane o fusile
un'acasazu a sigundu 'e s'ingrina.

Ma cando intrat su sole cua cua
e sa mama si giamat s'anzoneddu;
sos binujos t'aprencias, pastoreddu,
singultendo e bramendedi sa tua.

2° Premio Sezione A - Poesia in Rima - Premio Biennale di Poesia Sarda "Giorgio Pinna" - Pozzomaggiore 2015