Pastores e Canes
di Francesco Sanna

Che cane isoltu, sena mere e solu,
lassadu de su cuile apo s'affranzu;
ne fizos, ne muzere, ne cumpanzu
mi dan in su bisonzu unu consolu.

Ma mezus cane isoltu, tristu e lanzu,
che presu a una cadena o a unu coldiolu,
no’ chelzo pedigrì ne picagiolu
ne mere pro li lingher su calcanzu.

Ap'idu su bistiamene ismarridu
ca su pastore est diventadu vile:
cun lupos e matzones est cumpridu.

S'ia tentu catzadore su fradile
fui istadu cane 'e catza… garantidu !
Ca istimo su masone e i su cuile.

*** *** ***