Legginde sos giornales

Patata de Alborea
di Renzo Rosa

Tantos giornales po una chida intrea
Mos han tempus faghet, ammustradu
Sa bomba a manu chi han agattadu
In mesu sa patata de Alborea

Han’ammustradu cun titulos mannos
S’antigu ordinzu e sa segunda gherra
Chi in ottant’annos chi fu sutta terra
A niunu podiat prus fagher dannos

An fattu ier, su supermercadu
Chi de siguru passat e s’istoria
Po aer bendidu, unu pagu ‘e gloria
A chie sa patata hat comporadu

Ma no ammustran, su chi est sutzedinde
In d’una terra chi cun falsu iscopu
Bombas de abberu sun bettande troppu
E sa zente a faschias est morinde

E sun sighinde bruvera a prantare
In nomen e una guerra male fatta
Bruvera a su postu e sa patata
Chi non podet s’istogomo atatare

No ammustran, chi pizzinnos disperados
Famidos in chilca e mandigare
Morin subra sas bombas po chilcare
Una patata in sos campos minados!