Peraulas, peraulas e peraulas.
Si nde contant a millarias
siant bonas o siant malas
o siant comente si siant
naschias chi siant in conca
o puru campadas in aria
peraulas de onzi zenia.
paesanas, furisteras, timizosas, arrogantes
imbrastieras, o irfatzias
prontas a s’occasione a cumprire su dovere
a currer fatu a sos contos
a ponnere bucca in su fatu o a cumpiaghere su mere.

Peraulas disponibiles chi si dana a su bisonzu
chi si presentant bene pro poder narrer male.
e chi fartzas
a testimonzu zurant in tribunale.
Peraulas a bendere e ateras comporadas
in novas chi sunt iscritas in follios de zornale.
Peraulas brigajolas
chi faeddant chena misura
chi in buca de avocados che finint in protzedura.
Peraulas de onorevoles chi aprodant in parlamentu
cun promisas assortadas a si perderere in s’intentu.
Peraulas atrividas, de lusinga e de abusu
e peraulas chi si leant, sempre sa punta in susu.

Peraulas de pagu imprastu e peraulas de unore.
peraulas mancadas, dadas e no muntesas
e peraulas chi apparint, ma sunt chena pretesa.
Peraulas de benennidu e poi de dispedida.
Peraulas cumpanzas e chi ant cundidu sa vida
immerradas in s’amore su gosu e sa passione
e peraulas muduleas a fine de onzi cantone.

Ma tra totu sas peraulas
chi mi torrant in sa mente
de seguru sas menzus sunt sas chi no t’appo nadu,
pro lassare sas cosas, comente sunt istadas
pro lastimare sos annos, como chi sunt passados
pro suspirare sos cantos ch’amus lassadu a mesu
e pro ammentare a tie
e sas peraulas tuas
intro una poesia, chi tando, no appo cumpresu.