Lu tempu mudda l’ànima
a li cosi, a l’ommu prìmamenti,
accò ti n’abizzi ha ghjà
bedd’incugnaddu, ravvina
a cùa e di limma lu birbanti,
li frecci di lu rilógiu soiu
mòlani la realtài
più di la punta di un diamanti.
Mòlani l’incrìspi di li cari,
di l’ammenti, di li logghi
criduddi nostri, puru
di chista Terra suspesa in un mari
di malincunia. Ah, si n’alloggu
la mimoria, d’àlburi
di predda millenari, di li tanchi
gràiddi di spighi, di chiddi nidi
undi la Limba si fagia puisia,
suminendi di bocca in bocca
la so’ maia. E mi s’accrisa
lu cori si pensu a li chjocchi
svanuddi di distini dipindenti
solu da noi, a la còcchja verdi
in fummu in angeni chei, a li pamenti
sacrificaddi a dei
di inùtili gherri in tempi di pagi.

Alburi di siccagna, cantu imbara
ad arrastà l’alenu a chìddu foggu
chi cridiami oramai allummaddu
i’ lu sangu buttaddu gioanu,
buttaddu invanu che ghjunta
di sumenta i’ li ruccali. Ah, Terra
mea in culori di sippia, ah, tempu
chi fai la to’ facultài! Lu progressu
e lu miglioru di centu galidai
no arrèscini a iscancillà
da chistu cori la malincunia
chi l’affuga pa’ li troppi isteddi
studàddi e li surrisi, imbara a lu bugghju
lu cuggiolu di lu me’ “eu” e di lu soiu,
li cori nostri so in altru loggu, i’ li
periferii di noi matessi in cerca
di un centru chi macarri no v’è più.

Menzione XII premio di poesia “Pietro Casu” - Berchidda