Istracu a risu in coro e zapu in manu
Non pius birde birde che sa pampinella
Chi d'est de muda in s'istajone bella,
Mi dant ispera e gosu oje manzanu,

Filares riccos de frutu atonzinu,
Chi dae birdes si faghene iscuros
Sos pupujones, licanzos, maduros
De poder murghere e ponnere in tinu.

Tando cun arte, amore e passione
Manos fadadas chi l'ischin cernente
De tene ant cura in banzigu caente
Pro chi crescas curposu, imbriagone.

In su mustiu sa durche melodia
De airados "saccaromicetos"
Pro chi mezores sen' aer difetos
Atonana cuncordu, est poesia.

T'arrichis de profumos e sapores
E cando est s'ora zusta in magasinu
Ti batizo novellu e fatu a binu,
A tassa prena pones bonumore.

B'azungo casizolu e pane 'e vresa
Ben'arrostidos biculos de peta
Bancada ricca, ma nò est cumpreta
Si mancas tue su santu 'e sa mesa.

Manos nodosas ant b'atidu a lughe
Sa paga 'e sa fadiga e su suore
E ti perdono si pro troppu amore
Mi pones trampa e sas ancas a rughe.

Muzere e fizos mi narant cuntentos
Chi m'istat bene 'e m'alligrare a binu
Pro calch'ora, tutande in magasinu
Sos malumores e sos pessamentos.

Ma sa braga prus manna est in s'Artare
In calighe sacradu arzadu susu
Presentadu che samben de Zesùsu
A sos credentes, unidos umpare.

Terzo Premio Sezione B - Concorso di Poesia Viniscola - Siniscola 2016