Peutas...

di Benito Saba (2008)

Peutas in s'arenarzu est vida tua
in s'oru 'e mare...
In s'andera meledas e prammizas
pro 'incher, immortale, sa porfia
de s'olvidu 'e s'iscuru 'e s'intrinada
chi muddinat da' chelu in sa 'iddia...
e non t'abbizas
chi s'unda ammasuleri est irdisende
s'istiga e donzi sémida e ammentu
de custa ispeazada battimosa.
Mira!
Una basciura lèbia pro un'iscutta
poi totu in paris torrat, non b'at sinnu
de su fentomu tou...
... isvanessidu!...

Falat sa notte, falat...
... e ti frimmas...
e sas peutas tuas las sebestas!
Mannas e claras sun in mente 'e Deus...
passos tuos in chirca de sos frades
chi a su bisonzu t'an pedidu aggiudu!

Orme
Orme sull'arenile è la tua vita / in riva al mare... / Nell'andare indaffarato rifletti e vàluti / per vincere, immortale, la sfida / dell'oblio del buio del crepuscolo / che pioviggina dal cielo nella brina gelata... / e non t'accorgi / che l'onda indifferente via via cancella / l'impronta ed ogni traccia e ricordo / di questa camminata affannosa. / Guarda! / Una lieve depressione per breve tempo / poi tutto ritorna pianeggiante, non c'è segno / della tua rinomanza... / ...svanita!... /
Scende la notte, cala... / e ti fermi... / e le tue orme ben distingui! / Grandi e nitide sono nella mente di Dio... / i tuoi passi verso i fratelli / che nel bisogno ti han chiesto aiuto!

(1° Premio alla XIX Ediz. del "CUNCURSU DE POESIA IN LIMBA SARDA" – TETI – 2008)