Pianghet sa Terra...
di Tetta Becciu

Pianghet sa Terra
sos fizos chi pianghene ...
a boghe manna
jubilat
sos turmentos suos
de mama ...
in s’orizonte serradu
ue no brotant
in libertade sos fiores ...

sas mamas cantant
attittidos de dolore
ue naes de sole
carignant de travessu
sa Terra.

Finzas su ‘entu
non trazat pius sas nues
e sas arvures
mujant sas chimas
abbrazzadas in d’una istrinta ‘e fogu.

S’inghenia ‘e su male
appeddat in biddas ischirrioladas
ue sa morte a sa zega
ferret, chena seberu ...

In chelos chen’isteddos,
hat a brotare una die
su semene ‘e s’ispera,
su semene ‘e sa vida
pro su mare ‘e s’incrasa ...
... ... e non hat a sambenare
pius su sole,
non s’han’a appojare
intro sos coros
sas lagrimas
su sambene
su risu attogadu
de sos pitzinnos.