Est de piantu su primu saludu
chi damus a sa vida in naschimentu
pianghet cada mama in su momentu
pedinne a chelu dolorante azzudu
de lagimas bagnadu infustu e nudu
su nadu ne connoschet su sustentu
son lagimas ch’imperlan cussos ojos
sun sas chi isolven dolos e tripojos

sas lagimas ispinghen sos turmentos
chircanne de su tempus raichina
balsamu sun de coro e meighina
chi dana isfogu a sos patimentos
lepias fozas chi moghen sos ventos
brujan sos ojos lassanne s’ormina
falan che nues velan sa mirada
da issas s’esistenzia est bagnada

sas lagimas nos lavan sas feridas
canno caentes essin de dolore
issas no ana pesu e ne colore
no faghen sonu a nudu vestidas
amaras in sa morte e iscuridas
si de su coro istuttan su brujore
canno non versas lagimas a foras
atturdis s’anima e su corpus accoras