Pien'e sole cras bido beranos
di Domenico Angelo Fadda

Cant’apo in vida realizadu
est fruttu de tribagliu cun suore
non sempre dulch’a boltas cun dolore
est ‘istadu patidu unu regalu
chi cumpensaiat s’jerru malu
incunz’a cant’aia isperadu.

Pien’e sole cras bido sos beranos
po cussu fizu ch’est pensamentosu
ca de s’istudiu fattu nd’at su gosu
abert’a connoschentzia che ischente
at regoltu su suor’in sa mente
po dare ‘onas proas cun sas manos.

“Cherz’intrare in sas tuas bideas
cando in cussas paginas a perras
las aprendes a bolu e las afferras
e prima chi si che fuan trattenes
su sensu ‘onu e puru sos benes
chi chena lacanas a mod’impreas.”

“Non disisperes mai fizu caru
ca po a tie b’at un avvenire
e sas peleas tuas an a finire
chi sa diciosa sorte t’at a dare
su sacrifitziu fatt’a istudiare
ca d’insinzos non ses bistad’avaru.”

“Si unu cras ch’as a esser attesu
m’at a torrar’in mente cussu ‘asu
ch’ancor’a mannu mi torrat su pasu
cunfortende una domo istracca
e ca s’amore tou ap’affacca
cun s’affettu sas traschias m’as presu.“

Si su ‘entu est frimmu in s’aera
e no pisulat nuscos de suores
un’avreschida noa ‘e valores
cun linfa currend’est in sas venas
ca sos piseddos chi non timen penas
in caminu agatan estr’e ispera.

“Già t’ido in manu ranos de oro
chi seberas in mes’a sas ispinas
cun s’amada nd’as aere istrinas
ca siendas porridu t’ap’in coro.“

Menzione d’onore a Ozieri 19.12.10 “Premio Logudoro XXIX EDIZ.“ TEMA ISPERAS DE SUORE