Pilos de piche
di Tonino Fancello

Pilos de piche luchidos de antu
intro s’anima mia amadricada
in sa corona’e luche ses sestada
ca tuis su mementu chi m’ischidas
arrumba in s’ala cherzo chi mi ridas
chin cussas laras chi cundin s’incantu.

Una canzone cheres chi ti cante
chin boches chi racaman sas sirenas
frumene’e vida acchirras in sas venas
fachende irmenticare su dolore
benemi accantu e tessi cust’amore
chi su telarzu tù est importante.

Intas in ierru intendo su eranu
cando t’apresias galu a fache nidu
chin suspiros ch’ischidan su ninnidu
e allattan in sa terra cada ungrone
intas in s’abba intendo sa rejone
chi profumat de pache su manzanu.

Che rundinedda galu ser galana
intas si tritzas non falan in cara
ma che rubinu arrumbas perla rara
ca ses sa prima in coro c’appo amadu
intro cudd’era chi pariat furadu
donzi mementu in s’era chittulana.

Cantos ammentos e tottu po tene
sone su sensu chi po custa vida
cundin minuttos e oras de chida
abbaos chin su sambene chi t’untan
sone che frores in coro nd’ispuntan
e trazan in su tempus d’onzi bene.

Beni currende ruca su camminu
chi nos dividit nessi po un’iscutta
galu sa garria inoche no est rutta
toccheddat galu custu coro a forte
beni currende irfida cussa sorte
intas si…in zogu ponzo cust’ostinu.

Tessi s’amore chi filos de seda
fattu de tempus de durches mementos
beni un’iscutta in s’aidu e sor ventos
irvetto unu…asu… chi scherzo dae meda.

2^ Premio al Concorso di poesia “ Quartucciu 2010 ”