PISTIGHINZOS
“Menzione d’onore” al Premio di Poesia “Prantaferru”- XV Edizione - Paulilatino-25/09/2005

Assoladu in sos mios pensamentos
bolat sa conca in neulas de fastizos,
pistighinzos de babbos e de fizos
avolotados che furriabentos.

Assoladu in sos mios pensamentos…

In su frazile mundu de sos bios
t’an a distruer si non ses afàbile,
annegas si non ti mustras àbile
a giampiare frumenes e rios.

Assoladu in sos pensamentos mios…

Che babbu ‘onu deo t’apo pesadu
cun sos mezus cunsizos e maneras;
ist’atentu a matzones e a feras
ca s’anzone lu tenen aogiadu.

In sos mios pensamentos assoladu…

Non trascures sos bonos sentimentos
po no afaltzare sos passos chi pones,
po ch’in sa vida dogn’ora intones
cantos de gosu e pagos lamentos.

Assoladu in sos mios pensamentos…

De sa vida nd’acolzes sos butios,
e ti sien a favore in dogni muta
cun sa làmpana ‘e Deu semper alluta
fin’a connoscher sos chentu istios.

Assoladu in sos pensamentos mios…

E ap’esser deo puru asseliadu
su lu ‘ier creschinde in bona fama
dogni fizu chi m’at dadu sa mama,
cuntentu de sos ch’apo generadu.

In sos mios pensamentos assoladu…

Molian totora sos furriabentos,
a cando lenos, a cando pressosos:
nois ponimos fatu, disizosos
chi a sulare sien sos mezus bentos!

Assoladu in sos mios pensamentos…

Antonio Piras