Podes bolare in artu
de Giovanni Piga

(A s’amicu poeta Serbadore... arrimau in s’iscanneddu)

Non mi ponzas in punnas de impudu
si non t’hapo rispostu da-e prima,
lu faco commo, incust’ùmile rima,
imbiàndeti ’e coro unu saludu.

Sa neche est de su tempus, cada borta
t’obrìcat a sa lestra a lu sichire
chene ti dare àcchiu ’e remonire
mancu sos pessos in sa mente isorta.

Mi lu fittat su coro un’oriolu
cando mi naras chi ses arrimau
in d’un’iscannu bezzu. Codiau
però non ses, Badore, e mancu solu.

Sos chelos artos, totu s’Universu
tue t’aggrucas da-e s’iscanneddu,
e sa luna, su sole e cad’isteddu
carinnas chin s’alenu ’e unu versu.

Podes bolare in artu, in sas aéras
immaculadas de sa poesia
chin alas de fecunda fantasia
intessende ’e sa pache sas panderas.

Siat pro tene cussu unu cuffortu
chin d’un’abbrazzu ’e fide e de amore
ca sos fizos non dassat su Sennore
anzis, pro issos, in sa ruche est mortu.

Cando torrat sa notte a ispalattare
e nche colat ridende s’impuddile,
tando tue, Poeta, in su jannile
versos de bida intesses tot’a pare.

Semus de custa bida un’istajone
(mancari nos facamus piliesse)
ch’arbeschet e iscuricat in presse
che un’isparta ’e alas de puzone.

Eppuru, est a nos bier cantu mannos
in su Criau noìs nos credimus!
Ma semus pezzi prùgher e l’ischimus,
in runda in sas cussorjas de sos annos.

Ebbìa custu, amicu, pro cumprender
chi su tempus debbadas lu gherramus
si da-e s’òdiu non nos isfrancamus
chene mai tra frades nos offender.

Primu premiu in su "Premiu Logudoro" de Othieri - XVII editzione Setzione Rima a tema impostu: “Un’amigu”