"Poesia"

De sorte bona e sorte maligna
in poesia semper an iscritu,
de su ricu e de su poberitu,
de ilbandidos e delinquentes,
de pessones d'importu, Presidentes,
de zente onesta e de istima digna.

“Poesia” est arte e-d’est cultura
chi dat onore a tota sa Sardigna.

De cust’isula in eterna lotta
nd’an contadu, nde contan’ancora:
isfrutadores bènnidos da-e fora,
dominadores e meres istranzos
ammajados da fatziles balanzos…
e su sardu suerande sa pagnota.

“Poesia” est arte e-d’est cultura
chi dat onore a sa Sardigna tota.

A momentos de gosu e de dolore,
coros in festa e coros derrutos,
isposalitzios, nàschidas e lutos
ch’an resu trist’e allegra custa vida,
seranos feos e mezus albeschìda,
sa poesia lis at dadu valore.

“Poesia” est arte e-d’est cultura
ch’a tota sa Sardigna dat onore.

Istantes de bisonzu, de paura,
de sacrifitzios, famene e priogu,
inneddigores de dannalzu fogu
custa terra istimada nd’at connotu
e sun bistados arregoltos totu
in rimas bene fatas, a mesura.

Chi dat onore a tota sa Sardigna
est arte “Poesia” e d’est cultura.

Cantu e ballu li mudan sa ‘este,
in dogni festa li faghen onore,
cudd’atonada boghe ‘e cantadore
nde valorizat sas rimas perfetas,
dedicadas da famados poetas
a custa terra ospitale e areste.

Chi dat onore a tota sa Sardigna
est arte “Poesia”, cultura este.

Deo chi l’apo leada in simpatia
cando poto la uso, in umiltade,
e si podides semper la usade
po contare de tempos prus galanos
fatos de paghe, istrintas de manos
coment’augùro a totu ‘e parte mia.

Chi dat onore a tota sa Sardigna
est cultura e-d’est arte “Poesia”.

E po finire, “Poesia” est istoria…
po mantenner ischìda sa memoria!

Antonio Piras (Scano)