In sas prus altas chimas
de roccas solianas,
ube cuadu ‘e paghe est su siddadu,
m’accumpanzan sas rimas
de dolu e de mattanas
chi de s’ànimu s’ìntimu an sinnadu.
E su fogu istudadu
de pérdidos sentidos
alluminzare torra
intr’ ‘e custa pettorra
dia cherrer cun gosos consumidos,
po m’iscaldire ancora,
como chi frittu intendo innoghe fora.

E chena lughe iscrio
paràulas chi naschen
che sole cando abreschet su manzanu;
e tando in chelu ’io
cussas nues chi paschen
in su lugore nou, inube invanu
sos nuscos de s’ ‘eranu
chirco cun bramosia,
in sulcos de ammentu,
in padros d’ausentu,
semenados de ganas ch’intendia
currinde intr’ ‘e su coro,
in sas arestes àndalas insoro.

Prantare rosas cherzo,
po ti nde fagher donu
cand’an a crescher, friscas, fioridas;
e su coro t’abberzo,
dimandande perdonu
po sas promissas fattas isvanidas.
E tando mi nd’ischidas
cun albores pintados
in s’aera ispanéschida,
ube da ora est créschida
sa pranta ‘e sos disizos auppados,
chi dìliga m’isfozas,
cando de donzi dólima m’ispozas.

Poesia
Sulle cime più alte / di assolate rocce, / dov’è nascosto il tesoro della pace, / mi accompagnano le rime / di dolore e affanni / che il profondo dell’animo an segnato. / E il fuoco spento / di sentimenti perduti / accendere di nuovo / dentro questo petto / vorrei con piaceri consunti, / per riscaldarmi ancora, / ora che sento freddo qui fuori. //

E senza luce scrivo / parole che nascono / come il sole quando sorge al mattino; / e in cielo allora vedo / pascere quelle nubi / tra nuove luci, dove invano / i profumi della primavera / cerco ardentemente, / in solchi di ricordi, / in campi di tranquillità, / seminati di voglie che sentivo / correre nel cuore, / lungo i loro selvaggi sentieri. //

Voglio piantare rose, / per fartene dono / quando cresceranno, fresche, fiorite; / e ti apro il mio cuore, / chiedendo perdono / per le promesse finite nel nulla. / E allora mi risvegli / con albori dipinti / nell’aria schiarita, / dove da tempo è cresciuta / la pianta dei desideri infoltiti, / che delicata mi sfogli, / quando mi spogli di ogni lamento. //