Lampos in rima chi sa thudda vocana
intrana in mente ischidan su coro,
paret lizeri su faghere issoro
ma sos sentidos in totue tocana.

Intran pianu non pedin permissu
intrana a coro chin tratu gentile
e cun manera e faghere signorile
ti moricana in’intro senza avissu.

Lu aperin, l’iscrutana e lu ferin
lu sanan o su palpitu li mutana,
moghen sos bios su piantu assutana
donzi janna cunzada li aperin.

Parides nudda da totue essides
a sa mente li dades nutrimentu,
ischidanne de issa donzi ammentu
a sas feridas balsamu ponides.

De su dolore daides isfogu
su chi d’isse sa lacrima non lavat,
d’isse pones in rima su chi narat
istutanne de s’anima su fogu.

S’anima prenas d’amore e ispera
liganne disisperu e abbandonu
rennes a voche s’umanu perdonu
profumas e infriscas donzi aera.

Sughes sas bramas chi brujan su pettu
torras colore a sa fozza siccada
pones alas a s’idea fadada
de donzi edade ses su mannu isettu.

Pones in mente e coro cundierra
che campanas lo sonas a repiccu
faghes de onzi poveru unu riccu
de sa ricchesa li mustras sa terra.

Amiga ses de su coro afliggidu
a su cuntentu li pones sas alas
su bene e male ti pones in palas
li das abba a su coro assididu

Gai ti penso e ti appo a cantare
poesia cumpanza e vida mia
inumbe so o inumbe sia
semper chi tecus in coro cherjo istare

Nugoro, maju 2014