Poeta
di Ignazio Sanna

Li parauri chi dugna dì zi dimmu,
li di tutti li dì,
chissi di sempri,
a volthi bioddi, a mamenti aresthi,
so’ li matessi chi dizìa una di’,
poeta pa’ te soru,
e c’aschultabi, dizendi ch’era un deu.
L’isciubaraba e assintaba a una a una,
e di rigaru ti mandaba fiori
di giunchigli e viori
di parauri
e frammenti di cori e di suipiri.
Cosa, chi n’è d’allora cori meu?
E’ la vidda chi z’ha pienu di firiddi
e ha infriddaddu la gana di puisia;
e li parauri si so’ posthi a paru
a li di dugna dì, chissi di tutti,
li matessi chi fazini a li volthi
murì di pientu,
murì di disiperu.
Ma candu veggu la marincunia
chi ti dumanda di lu parchì e pa’cosa,
debi cridimmi, lu sa soru Deu
cantu vuraristhi’assé poeta,
soramenti pai te, cumenti allora.

Menzione d’onore Premio “SEUNIS”. Thiesi -2005

Poeta
Le parole che ogni giorno ci diciamo,/ quelle di tutti i giorni,/ quelle di sempre,/ a volte vuote,/ a momenti acerbe,/ sono le stesse che dicevo un giorno,/ poeta per te solo,/ e che ascoltavi, dicendo ch’ero un dio./ Le sceglievo e assemblavo ad una ad una/ e per regalo ti mandavo fiori/ di narcisi e viole/ di parole/ e frammenti di cuore e di sospiri./ Cosa, che n’è d’allora cuore mio?/ E’ la vita che ci ha colmato di ferite/ affievolendo la voglia di poesia;/ e le parole si son poste al pari/ di quelle d’ogni giorno, quelle di tutti,/ le stesse che alle volte fanno/ morir di pianto,/ morire di sconforto./ Ma quando vedo la malinconia/ che ti chiede del perché e di come,/ mi devi credere, lo sa solo Dio/ quanto vorrei essere poeta,/ solamente per te, come una volta.