Ma ite conto a sas mias isperas
a sos ammentos chi no tenent paghe
chi ancora mi cantan’in s’umbraghe
de su sole passadu in sas aeras ?

Sos poetes de parcu sunt atesu
a iscumbatu sa gara sighende
e deo galu frimmu lastimende
su vers’in bolu chi no s’est cumpresu.

Sos aficos de tando sunt ancora.
che sonos apicados a sos annos
ammadurados che budrones mannos
pro los passare in sa supressadora

Sa ’idda mi l’agato guasi tota
cando su tempus fit a crista ’ona
cadreas e banchitas in corona
suta su parcu a s’acota-acota.

Sos cantadores a s’arritz’e fala
su pasu longu cantu sa cantada
sa rima a boghe lena trasinada
cun su cuncordu prontu, sempr’a s’ala.

Pessosu mi b’istento in su sentore
de cussos annos cun finale tentu
sos versos intregados a su ’entu
d’a s’arte rara ’e s’improvisadore.

S’ograda de sa zente che puntada
sighiat cuddas rimas cun ispantu.
e su bellu chi fit in donzi cantu
cun zistros de assensu a sa serrada.

Carch’otava m’ammento pro intrega
pro la contare a sos chi no ant s’oju
ne ammentare podent cuss’abboju
de zente nara-nara in bon’allega.

Como prus de poetes no b’at cara
ne su laru fotzid’a zis’’e arcu
in sa festa nodìda no b’at parcu
e ne prus b’est su tema post’in gara.