Ponide sas travas a sa morte
di Larentu Pusceddu

(A s'amicu Sarbadore Marceddu)

Su calore de s'Istiu,
in Oniveri,
est astrau ierrile:
su nidu de sas culumbas
s'est mudadu in tanas
d'espes terranzas.

Est una maleditzione
sa nue tempestosa
de sos corruttos
chi cucuzat che pantuma
su chelu arridu,
sos coros marteddados
dae su dolore,
sos prantos assustados,
sas minettas mudas,
sos pensamentos alluttos,
sas miradas de odiu tzecu,
s'ispantu de sa zente.

Su mudimine est leze
inue sa leze no est zustitzia,
ca cumandan sos fusiles
e s'odiu non sichit prus
sas regulas connottas,
ma ischisinat tzecu
chena bider sa meria
e custa barbaridade
isconcat criaturas innossentes
e feminas indifesas.

Omines!!
Custu est inumanu isperdissiu,
ma si b'at galu unu bicculu de resone,
ponide sas travas a sa morte
e aberide sas jannas a sa pache.

(Segnalazione - "Barbaza" Nuoro 1991)