Pensamentu po me
non ti lês, Deus meu,
si puru apo peleas in sa vida.
Tue chi ses su re
de gosu e de anneu,
abbàida sa zente persighida.
B’at bisonzu ‘e azudu
ube su mundu est surdu, tzegu e mudu.

In terras arridadas
non creschen sas isperas,
ca làgrimas ebbia las infunden.
In gherras in debadas
de òmines che feras
su frade e su nemigu si cunfunden.
Giamande a Tie intendo,
ma su puite a bortas non cumprendo.

Non giogan sos pitzinnos
brincande in sa carrela,
curret sàmbene in mesu ‘e sas ruinas.
De paghe non b’at sinnos,
ne bentulat bandela,
de Te ch’an ammuntadu sas orminas.
Non brotat prus su semen
in tancas chi de ùrulos si tremen.

E deo innoghe vivo,
mancari in tribulia,
consolàndemi ‘e paghe e de amore.
Si de nudda mi brivo,
pranghet s’ànima mia,
ca de sos frades partit su dolore.
Tando m’invoco a Tie:
porri sa manu a issos, no a mie.

20 de Làmpadas 2016

2° Prèmiu in sa XVII Editzione de su Prèmiu Literàriu “Gurulis Vetus” – Padria 20 de austu 2016