Lavadu m’as
sas nues de mente
che abba frisca da untana umprida
in custu coro chi t’amat ardente
che ses intrada e mai ses iscida
ses de importu e faru luminosu
in ora iscura e mare burrascosu.
Nieddos velos dissipadu as tue
chi s’anima e tristura ian veladu
c’as cancelladu donzi iscura nue
che zeffiru sa mente ass’accraradu
su risu a mie as torradu in laras
ammentu suni sas oras amaras.
Sas tempestas de coro son finidas
in portu tranquillu mi as vattidu
innedda sunu sas dies frittidas
chi su coro m’aiana isfinidu
tue m’as dadu reposu e cunfortu
mi as torradu a bivu dae mortu.
In mare tempestosu navighenne
a portu riparadu mi as vattidu
sas fertas velas chi ippo isparghenne
as riparadu tue e affortidu
in mare custa nave as guidadu
su coro vrittu meu as cunfortadu.
Sas undas tempestosas remunidas
sos bios de su pettu sun passados
sas nues de sa mente son’essidas
finidos sun sos tempos affannados
torrat su sole isparin sas penas
appo recreu de sas cosas amenas.
No appo pius paura e su benente
canno ti sento a mie vicinu
sun nottes e dies torradas ridente
bi at reposu in su duru caminu
cun tecus de affidu e de cunfortu
so riparadu da ventos in portu
Trigulas, 2014
