Regodande sa Omo Bianca

Pranaperas in costa situada
Rica de armentos e pastura
Cun sa omo bianca a mes’artura
Pranaperas non t’apo ismentigada.

No apo ismentigadu sos momentos
Fatos de tristura o de alirghia
De dura realtade o fantasia
De malumores e bonos sentimentos.

Pranaperas curada e bene tenta
De olias e laore generosa
In beranu mudada che isposa
Profumada de lavros e de menta.

In s’ortalitzia fist sentze rivale
Sodisfaias sa vista e su coro
Cun perdinzanu e pomos de oro
Pisellu e piberone sentze uguale.

Alegumene friscu e sicadu
Sindria e melone in cantidade
Curcurighedda frisca ite bontade
Caul’e fiore e caule tupetadu.

De su giardinu fist orgogliosa
In totu sa cussorza mentovadu
Fintzas in campidanu fiat antadu
De pranaperas perla pretziosa.

Aranzos de onzi ratza e calidade
Mandarinos a sodisfatzione
Bator’o chimbe matas de limone
Pro cumpletare cust’amenidade.

E cando fiant de frutos amantados
Sos cambos inchinados pro su pesu
Pariant pro su color’e oro atzesu
Alvures de nadale illuminados.

Cantu ses longa ses attraessada
De unu riu de abba currente
In cussu tempus limpida e ridente
Abba bona sigura e immaculada.

S’abba guidada de manos siguras
Fatta passare in coras e canales
Fiat de sustentu pro sos animales
E de consolu a terras e colturas

Su riu generosu in cantidade
Ambidda e tinca nos at regaladu
Su pische in domo fiat assiguradu
In s’ierru comente in s’istade.

E deo pitzinnu solu e isconsoladu
So diventadu mannu primaridu
Non de pane ma de jogos famidu
Totu custu non l’apo apretziadu.

M’ammento cando chito su manzanu
In caminu pro andare a iscola
In s’istradone semper a sa sola
A passu lestru cun sos libros in manu.

Su andare a iscola fiat pro mè
Unu piaghere caru de pagare
Fiant noe tra andare e torrare
Sos kilometros chi mi faghia a pè.

Pranaperas su tempus ch’est passadu
Abarrant solamente sos ammentos
Como apretzo totus sos momentos
Passados in cuss’eremu incantadu.

Ammento una natura onesta e franca
Momentos chi non torrant de sa vida
Ammento una costera fiorida
Babbu Mamma e una Omo Bianca.

Ilartzi, su 18 ’e Cabudanni de su 2014