Precadorìa
di Rosalba Satta

Lassami
Deus meus, lassami
su ruju frontudu de s’ attanda
Lassami
Deus meu, lassami
su nuscu durchicheddu
de sos lizos de ribu
Lassami
Deus meu, lassami
su nara-nara de su barbiruju.
Lassami
chin sos ammentos friscos che nibe:
in s’appusentu ’e s’anima
b’est zente delissiosa
…cussa chi non connoschet accàbbu
c’hat semenau bertudes e maghìas.
Intendo, intendo bene!,
versos reberdes
luchidos che sole
cantos e contos
chi, fattu-fattu , ninnan s’ispiritu.
Sa janna ’e s’anima
-aperta a campu-
isettat su tempus benidore
pimpirinàu de cantos d’amistade.
Est framicòsa de fraternidade…
Lassami
Deus meu, lassami
sas notas durches de su firmamentu
e-i sa boche distinta de sas frinas
ch’ accasazat lebe-lebe sos ammentos
iffustos de lentore.
Riffriscami, Deus meu, riffriscami
sas radichinas de sa bida mea.