Pregadoria a Maria
di Antonio Piras

Da cuddos peus males boltuladu,
da maladias, odios e gherras,
da noales e betzas cuntierras
bivimos una vida de avolotu,
de isperantzias e cosas a drotu
chi faghen su chelbeddu issiminjadu.

Maria chi das paghe e chi ses lughe
azua a custu mundu ilbariadu!

Semus falande semper prus a fundu,
amos bisonzu ‘e sentimentos bonos
de onestade, sintzeros perdonos,
de peraulas ch’abbrandan su dolore
e chi preigan cuncordia e amore
po intonare unu ballu tundu.

Maria chi das paghe e chi ses lughe
azua a custu ilbariadu mundu!

Tantos malignos traman a sa cua
po semenare odios e terrores!
Tempos sun oe de malos gherradores
chi addestran afabiles ischentes
po ispalgher su samben de innotzentes
chi bi perin che pische tentu a lua.

Maria chi das paghe e chi ses lughe
a custu mundu ilbariadu azua!

Che a Cristu chi amos post’in rughe
cun ingannos e faltzos giuramentos
oe puru bi nd’at chentos e chentos,
mizas e mizas, abiles tiranos :
cherinde otenner diritos umanos
tocat chi mi umilie e m’imbrenughe!

Azua a custu mundu ilbariadu
Maria chi das paghe e chi ses lughe!

Da chi ap’esser in s’eternu umbraghe
costoidu da santos e anghelos,
in sa lumenera ‘e cussos chelos
at esser totu ater’una vida
ue cudda culumba bianca nida
mi riparat cun alas faghe faghe.

Azua a custu mundu ilbariadu
Maria chi ses lughe e chi das paghe!

De t’intonare una pregadoria
no’ mi nd’istraco ne mi nde ligonzo,
una bona peraula bi la ponzo
po custa umanidade tribulada:
chi sos distratos torren in s’istrada
cun sos travessos de dogni zenia.

Azua a custu mundu ilbariadu
chi paghe das e lughe ses, Maria!

(3° premio al Concorso Letterario “Su contixeddu” di Brescia - VII Edizione 2007)