1
Gosu e recreu istas agurenne,
mai ti’stracas mama isfortunada,
canno ninnias sa fiza adorada
bona fortuna l’istas semper nenne
chin s’oju apertu istas sonnienne
chi nessa fiza tua siat dadu
su chi a tie sa sorte ti at negadu.

2
A conca ischinta senza mucadore,
unu isciallinu in palas ghetadu
pro cudda fizza chi tue as penadu
t’invocas a sa mama e su segnore,
c’ a fizza tua l’annett’ in favore
sa sorte chi a tie at maltrattadu,
tanno ,s’orcu torranne, a sa chillia
cantas torra pianu sa ninnia.

3
Dormi serena dormi coro e mama
dormi in custa poghera domitta
canno tue ass’ essere prus mannita
de mama tua potha esser brama
d’onestade e bellesa voches fama
sa lughe allugas umbe tue abittas
sa vida tua siat carignada
de ricchesas e donos pienada.

4
Dormi, no appas pena fizza mea
Deus ti prenet de paghe e salude
chi ti diat in vida ogni virtude,
de sa bellessa potas esser dea.
non patas mai pena e nen pelea
santos de chelu a issa vattude
sas grascias chi a mie azzes negadu
pro consolu e su c’appo passadu.

5
In foras istat est sa luna abbadienne
gettanne sorcu dae sa ventana
senz’aer presse e sena n’aer gana
paret chi l’accumpanzet ninnienne
e dae chelu li paret narenne
non siat su dolore cosa vana
ista chi su bisonzu a bonu faghe
sicchi chi sa ninnia in santa paghe.

6
Sos dolores chi Deus ti at dadu
son de sa vida amaru cunnimentu
sos chi ti son toccados e as tentu
su bellu coro tou an formadu
medas chi mai lacrima an vocadu
non i schini it’est pena it’est cuntentu
senna Gesu este istadu male
pro conoscere su bene celestiale.