Volas pren’e dulcura a mie in tunnu
m’infascas tue chin nues de fumu
in disisperu pesante che prumu
parjo perdidu falannech’ a funnu

Ses che debile chima a umbe ligo
sa brama mea de sicu giardinu
s’ultima rosa de ponnere in sinu
abba lughente inumbe m’isprigo

Est da s’ ispera ogni brama vinta
est de su coro su mutire anneu
chin tecus chircat via a su recreu
so che pintore chi no at prus tinta

Mutinn’a mie pares timorosa
sos ojos firman s’iscura notada
timorosa ti mustras innudada
de mudura piena e amorosa

Paren so sinos biancos che nie
duas undas suaves de deliru
riparu portu de cussu regiru
chi in conca mi mutit note e die

Paren alas d’una mariposa
sas laras tuas de rujore pintas
in su reposu da bramas ispintas
dae s’alenu in petalos de rosa

Moghes su tempus chi si fit firmadu
volas ti moghes pares in totue
lizera prena pares una nue
prena de abba chi m’at infriscadu

Sant’Andria, 2016