P R E N D A S

Rit.

Chelu nos at dadu, terra e mare
Soberànu su Deus Onnipotente,
su tempus passadu e-i su presente
e-i su benidore pro isperare.

Prendas de terra e prendas marinas
Sutt’a sas prendas de s’immensa arcada,
ervas, feras, pisches e pretziada
onzi aèra e bentu e abba e frinas
e benas ierrìtzas curridinas
iscurrizant in totta sa leàda.
Su sole chi allughet sa natura
Sa vida est pro donzi criadùra.

Rit.

Chelu nos at dadu, ecc.

E-i su Deus Onnipotente soberanu
A risu in laras, a cara sulena
Sighit a imbiàre a manu piena
Prendas e prendas sempre fitiànu.
Prenda est s’atunzu, prenda su beranu,
s’ijerru, s’istadiale e donzi bena.
Ma sa pius prenda manna est unu fizu:
de su Criadòre Eternu est s’assimìzu.

Rit.

Chelu nos at dadu, ecc.

12.12.1993 Nino Fois

“PRENDAS” est una cantone iscritta dae Nino Fois, musicada e cantada dae Giuanne Maronzu de Berchidda