Pro sa morte de Pinuccio Sciola
de Peppe Montesu
Oje sas predas tuas sunu in luttu
luttuosa est s’issoro melodia
una morte arrivada primidia
s’oricra issoro lis’at mortu e ruttu

Oje non cantan non sonan ninnia
su dolore lis’essit a sucutu
pro ispannare che funebre mutu
in terra sarda s’atitadoria

Sardigna mama sos sonos intenne
chi dae cussas predas sun’essinne
e in s’aera los leat su ventu

Su fizu tou amadu s’est ispentu
sas roccas a sos chelos sun pedinne
pregadorias sun tottu narenne


Maju 2016