Pro Santa Barbara
di Giovanni Loddo

In sa famosa antiga Nicomedia,
Cittadella de s'Asia Minore,
Barbara, in su dughentos ses naschida.

Non pensaiasa a sa celeste sedia
Ca vis promissa a unu paganu amore,
Sola cun Babbu tou de guida.

In mesu e tantu bene in custa vida
Ma candu as'incontradu a Origene
E s’evangelu t’ada illustradu
E sa dottrina pro su Regnu Santu
In custa vida in mesu e bene tantu
Ma candu asa incontradu a Origene
In custa vida in mesu a tantu bene
Ma candu a Origene asa incontradu
E s’evangelu t’ada illustradu
E de su Regnu Santu sa dottrina
Tantu amore e grazia Divina
In custu coro tou este intrada

De nascostu ti sese Battizzada
Pritte cun veru amore in Deus crese
Babbu tou, crudele, cun rancore
Ti cheret pagana a ogni costu
Battizada ti sese de nascostu
Pritte cun veru amore in Deus crese
De nascostu Battizada ti sese
Pritte in Deus cres cun veru. amore
Babbu tou, crudele, cun rancore
A ogni costu ti cheret Pagana
Ma tue che Ulmina Cristiana
Ti ses calzada e postu sa veste.

Tant'amore e grazia Divina
In custu coro tou intrada este.

In Tribunale de sa corte terreste
Su destinu tracciadu t’at sa sorte
Babbu tou che vile assassinu
Tottu in d’una ad estradu su pugnale
In sa terreste corte in Tribunale
Su destinu tracciadu t’at sa sorte
In tribunale de sa terreste corte
Sa sorte t’at tracciadu su destinu
Babbu tou che vile assassinu.
Tott' in d’una su pugnale ad’estradu
Cun tanta ira t’ada pugnaladu
E domandas perdonu in contu sou.

Tant'amore e grazia divina
Este intrada in custu coro tou.

Ulassa in'omaggiu ogni annu a nou
Cun ballos e folklore in sa piassa
Est festa manna in su tou onore
In data tres dominigas de maggiu
Ogni annu a nou Ulassa in omaggiu
Cun ballos e folklore in sa piassa
Ogni annu a nou in omaggiu Ulassa
In sa piassa cun ballos e folklore
Est festa manna in su tou onore
De maggiu tres dominigas in data.

T’an preghiera e novena fatta
Tott’in fila preghende in cantilena

T’an preghiera fatta e novena
Tott’in fila in cantilena preghende
A sa Capella inue ses regnende
Tue Barbara Santa verginella
Inue ses regnende in sa Capella

Barbara Santa verginella tue.

Dae su chelu ue ses in que
Pensa pro s'ulassesa residensia
Impare a sa Divina Onnipotensia
Protegge su pastore e bestiamene
E su poveritu chi at famene
Impare a su chi este afflittu pensa
Deo e parte mia in recumpensa
Ti fatto devota preghiera
Tue Barbara faghe sa manera
Non nde lessas mancunu ismentigadu
Ca sempre ses istada ‘e bonu coro
Protegge s'ulassesu populadu
Chi continu devotu t‘at pregadu
Martire fizza ona de Dioscoro.

(1978)