Pro sos vint’annos de attividade de s’Avis de Bolotana
di Antonio Longu

Battor lustros che sun’ bell’e colados
da cando in bidda s’Avis han fundadu,
dande avvìu a su volotariadu
pro dare amparu a sos isfortunados,

chi a travasos de samben cundennados
han’ solu ispera in su ch’‘enit donadu.
E si semiza “saccas” nd’han versadu,
meritan totus chi ‘enzan premiados,

dae su presidente fundadore
a su chi nd’hat donadu un’orta ebbia,
ca fattu finas cussu s’hat onore.

Prit’est un’ attu ‘e vera balentìa:
dare su samben sou cun amore
pro curare s’anzena maladìa.

E deo, cun cust’umile faìna,
ca menzus cosa non bos poto dare,
bos scherzo totugantos abbratzare
nendebos de sighire in cussa ormìna.