Pro ti narrer chi sese...
di Salvatore Ladu

In pes de un’agrustu
Faghimus serenada
Alligrados a binu

In pes de un’agrustu

In su lettu corcada
Cun d’una manu in sinu
Sas laras t’appo infustu.

In chelu sos issteddos
Che antiga fressada
Lacriman de piantu

In chelu sos isteddos

Ti do a s’ischidada
Si mi visas accantu
Basos a pittigheddos.

In su monte ‘e Nugoro
Andat s’astore in bolu
Lepieddu che nue

In su monte ‘e Nugoro

Mannu est s’oriolu
Da cando bi ses tue
In sa janna ‘e su coro.

De cheriasa e pruna
Mi che mò sos disizzos
Prenandemi isporteddos

De cheriasa e pruna

Lughended’in sos chizos
Duos ocros nigheddos
Sun’ispriccu a sa luna

Feridas e piagas
Las cherio sanare
Cantande in poesia

Feridas e piagas

Solu su lu pessare
Chi cras ses tottu mia
Sos sensos m’imbriagas

Che sas undas de mare
Sas nues sun currende
Dae bentos ispintas

Che sas undas de mare

Nara chi ses tessende
Cant’in ojos as pintas
Nottes de las gosare.

Su pinzu ‘e sa cuccanna
L’ispicco de seguru
Ch’app’in benas fiammas

Su pinzu ‘e sa cuccanna

Aspettami a s’iscuru
S’est abberu chi m’amas
Istasero in sa janna.

Pro ti narrer chi sese
Bella che i s’’isteddu
Su chi tancat sa die

Pro ti narrer chi sese

Bella che i s’aneddu
Chi oje dò a tie
Imbenujadu in pese.