1
Prite tantu dolore Deus meu
tant’afannu pruite e tanta pena
pruite nos isconzas sa carena
ponennos in dolu e in ispreu.
Prite sa zente pones in anneu
e ti faghes de malu trista vena?
Cale bene est chi b’at in su patire
si tue l’ischis faghemilu ischire.
2
Pruite a medas sa vista li negas
de sos colores chi tue as criadu ?
Nara prite a tantos est negadu
De intennere sonu chin allegas?
prite de issos sas isperas segas
si sempere issos ti an veneradu?
Prite donzi anelu moris d’issos
e los tenes viventes crucefissos?
3
Cale barbaru coro juches tue
si no intennes sa prega e mama
si de infermos no intennes giama
ch’in lagrimas pianghen rue rue?
Prite promittis sa vida atterue
canno in custa ne secas sa trama?
Narami tue umbe est sa bontade
si tratas goi custa umanidade.
4
Jeo curvo sa conca ubbidiente
no so jeo chi t’apo a currezire
ma si est vanu a tie a pedire
a chie chircat sa povera zente?
Non podet s’umana mia mente
custu faghere tou cumprennire
si pro aflittos est sa vida vana
chircanne ispera tra males e gana.
5
As criadu su munnu e bene fatu
e a medas lu negas de godire
solamente los pones a sufrire
non das a issos su meritu adatu
colan sa vida issoro in disacatu
prestu pedinne chi potat finire
non ses persona c’at bene divisu
ca das piantu ammiscuradu a risu.
6
Paret chi godas a poner dolore
a chie de recreu at su meritu
a issos tue mai as beneittu
e los trattas chin rigidu rigore
ma tue chi de totu ses Segnore
in custa vida li negas s’invitu
in afannos los pone a sufrire
proite custu lu cheria ischire.
7
Iscusa tue custu meu ardire
e s’insolente ti parjo chi sia
ma sa salude pro idea mia
parthida vata che i su patire
su babbu bonu lu assa ischire
chi de su zustu naran siat mastru
non faghet mai su fizu a fizastru.

Santu Gavine, 2015