PUETA?

No è lu meu
l'arenu d'un pueta
candu lu raióru
di la marasorthi
m'arrodda l'ugni
che rasoggi
pa' trampà la néura fraizza
chi si pesa da lu mondu.
E no è cantu di puisia
lu zuccheddu assusthaddu
di lu cori
candu vedi
i' l'azzadda chena fini
zentu barandigli
àrriddi di trampi
pronti
pa' arriggì li passi
a me' figliori.
La luzi di la luna
più no mi rigara
impratiadda
l'azzòra di lu firu
pa' tissì la téra
di la fantasia
e la bozi pibiosa
di lu riu
lu giògguru no ninna
lizéri di li fori.
Soru una gana manna
di ghirrà
immobi la me' manu
chi iffrabbineggia
paràuri nieddi
chena pasu
drent'a un fògliu.
Una gana manna di ghirrà
pa' no campà
che una mariunetta
pessa i' lu maisthrari
di la vidda,
pa' arribbà
drentu a li me' veni
minudda
una làgrima d'amori.

Maria Antonietta Noce

La poesia pueta? è vincitrice premio Romangia