Pusadda in d-un’isthella
di Gigi Noce

Aisettami,
pusadda in d-un’isthella.
No’ soggu cantu
abarè d’aisittà
‘chì soggu torra liàddu
a chissa vidda
chi z’abaristhia vuruddu di lampà

Vogliu furalli l’anni a te furaddi
e vibì chistha vidda a te nigadda
e avvibarà(1) cun canti di puisia
una fiara(2) chi no’ s’è mai isthudadda(3).

Aisettami
e no’ dumandammi candu
e chissa dì abaraggiu a cuglì
pai te,
tra lu lintori(4) di li fiori,
li prelli(5) chi cun me ha pientu lu zeru
la dì chi z’è buraddu chist’amori.

1) ravvivare
2) fiamma
3) spenta
4 )rugiada
5) perle ovvero lacrime