A unu pitzinneddu mortu in sa gherra

Como chi sa tzarra ‘e sos cannones
in mutria s’est tramudada,
e su lugore ‘e sos fusiles
pius sa note non t’at a ispannare,
como chi sos carignos de una mama
in su nudda s’ant arrimare,
cun pumas noas ti ses mudadu.

Puzoneddu, atesu ses fuidu,
cando ancora imberriu cherias.
Pesadi lieru cun alas de ‘entu,
in d’unu mundu de tucaru e mele,
e aboja columbas in bolu,
cun ratos birdes de olia.

Ti coglint imberrios de janas,
in domos de pane turradu,
cun sas ventanas de licarissu,
e bantzigos de petalu ‘e rosa.

E ti asant laras de luna,
ninnende sa oza pitzinna,
sos isteddos ti torrant su risu,
e sos anghelos iscantiant sas penas.

Mai pius as a tenner avrinas,
e aghejos de mala ura,
as a essere bandela ‘e fortuna
pro sos miseros chi ant a restare.

As a giogare cun pilos de sole,
pro ti fagher tritzas de oro,
e cun anzoneddos inseddados de arghentu,
e caddos alados pro ti fagher sonniare.

In tirighinos de turrone e nunzola
unu cua-cua as a inventare,
cun sos fedales de onzi faeddu,
e non b’at isteddu chi non ti cheret mirare.

E sos pisches nadende in s’aera,
in undas de nue s’ant a frimmare.

E cando sos giogos, istracos,
s’ant a cuare in bia ‘e sos sonnios,
in coa ‘e Mama* t’as a pasare. *Nostra Segnora

E intanto issa^ messat ancora ^sa morte
in padros chena un’edade,
e chena mai mudare su pannu,
sa janna aberit a un’atera die.